SPAR Kalvåg utvidar opningstidene med RMA-Butikkstyring

Same betente kjernetid som før

Med RMA-Butikkstyring kan butikken halde ope frå klokka 06 til 23. Den betente kjernetida blir den same som før: måndag til fredag 08–18 og laurdag fram til klokka 16.

– Nokre kundar har vore uroa for at overgangen til høgteknologisk og delvis fjernbetent butikk skal gå ut over arbeidsplassar. Men vi gjer jo ikkje dette for å kutte kostnader – vi vil styrke butikken og bygda! Vi gir kundane eit betre tilbod, seier butikksjef Renate Olaug Naustdal.

Betre tilbod for hyttefolk og fiskeindustri

Idylliske Kalvåg i Bremanger er rekna som ein typisk turiststad, og har mange hyttefolk. Det gjer at butikken har høve til å halde søndagsope i sommarmånadene. Hyttefolket har sjølve gitt signal om at dei treng lengre opningstider, fordi dei ofte ikkje rekk å handle etter at dei har kome fram til feriestaden i Kalvåg.

Bygda har òg mykje fiskeindustri.

– No får dei tilsette moglegheit til å bruke butikken både før og etter jobb, seier Naustdal.

Dei lokale har vore spente, og mange har gleda seg til å teste ut den høgteknologiske butikken.

Ein viktig sosial møteplass

Butikken har ei viktig rolle som sosial møteplass i bygda. Kvar tysdag blir det arrangert felles handletur for pensjonistane.

– Vi har fire faste pensjonistar som hjelper til med å køyre rundt alle dei som ikkje kan køyre sjølve. Då får dei handla, samtidig som dei treffest og får både kaffi og noko søtt. Det set dei pris på, seier Naustdal.